He aha te mahi?

Whakamahia ai te omeprazole hei whakamaimoa me te ārai i ētahi mate puku, pērā i te tokopā, te rongo i te waikawa puku, me ngā huahua. He whakaiti i te rahinga o te waikawa kei tō puku.

I mua i to tīmata

• Me kōrero atu ki tō mātanga hauora mēnā kei te hapū koe, kei te whai rānei koe kia hapū koe, kei te whāngaiū rānei.

Me pēhea te kai?

Me kai te omeprazole e ai ki ngā tohutohu me tētahi inu wai. Ka taea tēnei te kai i te taha o te kai, kāore rānei, engari ka pai ake pea te mahi mēnā ka kainga i mua o te kai.
Ngā pire rango, pire parehe rānei: Mēnā kei te uaua tō horomi ka taea te huaki te pire rango, te wāwāhi rānei i te pire parehe ka whakaranu ki tētahi rahinga kai ngāwari iti, wē rānei. Me horomi me te kore ngaungau. Kaua e kopenu i ngā mea o roto i te pire rango, pire parehe rānei.
Wē: Kia kaha tonu te rurerure i mua o te whakapeto. Āta inea ia horopeta mā tētahi pūwero, pune ine rānei.

Ka aha mēnā ka wareware i a koe tētahi horopeta te kai?

Mēnā kua tata ki te wā mō tō horopeta whai ake, me waiho te horopeta i tāhapa ka kai i tō kai horopeta whai ake hei taua wā anō. Tērā rānei, me kai te horopeta i tāhapa ina maumahara koe. Kaua rawa e kai i ngā horopeta e rua i te wā kotahi.

Ka taea anō e koe ētahi atu rongoā te kai?

Ka tukituki pea ētahi rongoā ehara i te ōta rongoā ki te omeprazole, pērā i ēnei:

• ngā hua āpiti rino (hei tauira, Ferro-Tab®)

Me kōrero atu ki tō kaitaka rongoā, rata rānei mō ngā rongoā katoa, whakamaimoatanga rānei e whiwhi ana koe, tae atu ki ngā huaora, ngā hua otaota (hei tauira, St John's wort), ngā whakapōauau rānei.

He aha ngā hua kino ka rongo pea koe?

Ngā Hua Kino	Tūtohutanga hei whai
Hukihuki, uauawhiti rānei, ngenge, ngoikore rānei, tengatenga, kēkerewai rānei (he tohu pea kei te iti te konupora)	Me kōrero atu ki tō rata

Ki te pā mai ētahi atu hua kino, me kōrero atu ki tō rata, kaitaka rongoā rānei.

Ētahi atu mōhiohio:

• I ngā wā tino rerekē, ka taea e te omeprazole te pā mai he raruraru ki ō tākihi. I te nuinga o te wā kāore he tohu, engari tērā pea ka tino ngenge koe, ka tino ngoikore, ka pā te kirikā, ka whakapairuaki rānei. Me kōrero atu ki tō mātanga hauora mō tēnei.
• Mēnā kei te pai te whakahaere i ō tohumate, kōrerohia ki tō rata mēnā me haere tonu koe ki te tango i te omeprazole. Tērā pea ka tūtohu rātou kia whakamutu. Ina whakamutu koe, ka puta pea te hoki o te waikawa puku me te pohongāwhā mō ngā wiki ruarua noa iho. Kōrerohia ki tō mātanga hauora mēnā he raruraru ēnei, mēnā rānei kāore e pai ake.
• Ka pā mai pea ngā pānga kino o te whakamahi i te omeprazole mō te wā roa, pērā i ngā kōiwi ngoikore, ngā whakapokenga puku, me te iti o te huaora B12. Me kōrero atu ki tō rata mēnā kei te mate kōiwi, mēnā ka pā mai te mate tikotiko kaha, te mamae puku rānei, mēnā rānei kei te āwangawanga koe mō te huaora B12. Kōrero ki tō rata mō te roa e tika ana kia kai koe i te omeprazole.
• Me putu te wē omeprazole ki te pouaka mātao. Mēnā he toenga wē āu i muri i te rā mōnehu kua tāngia i te pātara, me whakahoki ki tō taka rongoā.