He aha te mahi?

Whakamahia ai te sacubitril me te valsartan hei whakamaimoa i te hēnga manawa. He whakaiti i te wai tuwhene i roto i tō tinana me te whakangohe i ngā ia toto, kia māmā ai te tuku toto a tō manawa ki tō tinana katoa.

I mua i to tīmata

• Me mātua whakamutu e koe ētahi atu o ō rongoā hēnga manawa (pērā i te cilazapril, losartan me ērā he ‘pril’, he ‘artan’ rānei kei te mutunga o te kupu). Me kōrero ki tō mātanga hauora ko tēhea te rongoā kei te whakamutua, ā, mō āhea tīmata ai ki te kai sacubitril me te valsartan. Me whakahoki atu ngā rongoā kua whakamutua e koe ki tō taka rongoā.
• Me kōrero atu ki tō mātanga hauora mēnā he mate tākihi tōu, mēnā rānei i pā mai te angioedema (pupuhi ngā ngutu, arero, korokoro, kanohi rānei) ki a koe.
• Me kōrero atu ki tō mātanga hauora mēnā kei te hapū koe, kei te whai rānei koe kia hapū koe, kei te whāngaiū rānei.

Me pēhea te kai?

Me kai te sacubitril me te valsartan e ai ki ngā tohutohu me tētahi inu wai. Ka taea tēnei te kai i te taha o te kai, kāore rānei.

Ka aha mēnā ka wareware i a koe tētahi horopeta te kai?

Mēnā kua tata ki te wā mō tō horopeta whai ake, me waiho te horopeta i tāhapa ka kai i tō kai horopeta whai ake hei taua wā anō. Tērā rānei, me kai te horopeta i tāhapa ina maumahara koe. Kaua rawa e kai i ngā horopeta e rua i te wā kotahi.

Ka taea anō e koe ētahi atu rongoā te kai?

Ka tukituki pea ētahi rongoā ehara i te ōta rongoā ki te sacubitril and valsartan, pērā i ēnei:

• ngā pire ārai-whakakakā, pērā i te diclofenac (hei tauira, Voltaren®), ibuprofen (hei tauira, Nurofen®), aspirin rānei (hei tauira, Disprin®, kei ngā horopeta whakamauru mamae). Ka kitea ēnei i roto i ētahi rongoā rewharewha me te whurū (hei tauira, Nurofen Cold me te Flu®)
• ngā hua āpiti konurehu (hei tauira, Span K®)

Me kōrero atu ki tō mātanga hauora mō ngā rongoā katoa, whakamaimoatanga rānei e whiwhi ana koe, tae atu ki ngā huaora, ngā hua otaota, ngā whakapōauau rānei.

He aha ngā hua kino ka rongo pea koe?

Ngā Hua Kino	Tūtohutanga hei whai
Pupuhi ngā ngutu, arero, korokoro, kanohi rānei	Me wawe te kōrero atu ki tō mātanga hauora
Ka rerekē te kapa manawa, ka uauawhiti, ngoikore rānei ngā uaua	Me kōrero atu ki tō mātanga hauora
Maremare	Me kōrero atu ki tō mātanga hauora mēnā he raruraru
Ko ngā tohumate o te toto pūroto pērā i te pōātinitini, tāporepore rānei	Me āta tū ake. Mēnā kei te pā tonu mai, he tino kino rānei me kōrero atu ki tō mātanga hauora.

Ki te pā mai ētahi atu hua kino, me kōrero atu ki tō rata, kaitaka rongoā rānei.

Ētahi atu mōhiohio:

• Me auau tō whiwhi whakamātautau toto i a koe e kai ana i te sacubitril and valsartan hei tirotiro mēnā kei te pā he raruraru ki ō tākihi, te rahinga rānei o te konurehu i roto i ō toto.